Pullik ta’lim xizmatlari shartnomasi

1. SHARTNOMA PREDMETI

1.1.Ta’lim beruvchi Ta’lim oluvchiga Shartnoma kartasida ko‘rsatilgan kurs bo‘yicha pullik ta’lim xizmatini onlayn, oflayn yoki aralash shaklda ko‘rsatadi, Ta’lim oluvchi esa uni qabul qiladi va belgilangan haqni to‘laydi.

1.2.Kurs yakunida beriladigan sertifikat kursni muvaffaqiyatli tamomlaganlikni tasdiqlaydi va, agar qonunchilikda boshqacha belgilanmagan bo‘lsa, davlat diplomi yoki malaka hujjati maqomiga ega emas.

1.3.Ta’lim natijasi Ta’lim oluvchining qatnashishi, mustaqil mehnati va avvalgi tayyorgarligiga ham bog‘liq. Ta’lim beruvchi daromad, ishga joylashish, mijoz topish yoki boshqa tijoriy natijani kafolatlamaydi; reklamadagi boshqa tinglovchilarning natijalari individual misollardir.

2. TA’LIM BERUVCHINING MAJBURIYATLARI VA HUQUQLARI

2.1.Ta’lim beruvchi darslarni o‘quv dasturiga muvofiq malakali trenerlar orqali o‘tkazadi, zarur o‘quv materiallarini taqdim etadi, kurs boshlanishidan oldin dars jadvali, platforma va imtihon tartibini yetkazadi hamda Ta’lim oluvchining shaxsga doir ma’lumotlarini qonunchilikka muvofiq himoya qiladi.

2.2.Ta’lim beruvchi tomonidagi texnik nosozlik sababli dars o‘tmasa, u darsni boshqa vaqtga ko‘chiradi, yozuvini taqdim etadi yoki mazmunan teng boshqa yechim bilan qoplaydi.

2.3.Ta’lim beruvchi trenerni, dars vaqtini yoki platformani almashtirishi mumkin; bunda Ta’lim oluvchi oldindan xabardor qilinadi va kursning umumiy hajmi kamaytirilmaydi.

2.4.Ta’lim beruvchi Ta’lim oluvchining darslar, guruh yoki materiallardan foydalanishini: to‘lov o‘z vaqtida qilinmasa — to‘lov amalga oshirilgunga qadar; dars jarayoniga muntazam xalaqit berilsa yoki ishtirokchilar va trenerlarga nisbatan haqoratli xatti-harakat qilinsa — ogohlantirishdan so‘ng; 4-bo‘lim talablari buzilsa — cheklash yoki to‘xtatishga haqli.

3. TA’LIM OLUVCHINING MAJBURIYATLARI

3.1.Ta’lim oluvchi to‘lovni belgilangan muddatda amalga oshiradi, darslarda muntazam qatnashadi va topshiriqlarni bajaradi, ichki tartib va odob-axloq qoidalariga rioya qiladi, haqqoniy ma’lumotlar taqdim etadi.

3.2.Onlayn ta’lim uchun zarur internet va qurilmani Ta’lim oluvchi o‘zi ta’minlaydi; ulardagi uzilishlar Ta’lim beruvchining aybi hisoblanmaydi.

4. O‘QUV MATERIALLARI

4.1.Video darslar, qo‘llanmalar, testlar, prezentatsiyalar va boshqa materiallar Ta’lim beruvchi yoki huquq egalarining intellektual mulkidir. Ta’lim oluvchiga ulardan faqat shaxsiy ta’lim maqsadida foydalanish huquqi beriladi.

4.2.Ta’lim beruvchining yozma roziligisiz materiallarni nusxalash, sotish, Telegram guruhlari yoki Internetga tarqatish, darslarni yozib olish, shuningdek login, parol yoki kirish havolasini boshqa shaxsga berish taqiqlanadi. Buning oqibatlari uchun Ta’lim oluvchi javobgar bo‘ladi; Ta’lim beruvchi yetkazilgan zararni qonunchilikka muvofiq undirishi mumkin.

4.3.Materiallarga kirish kurs boshlangan kundan Shartnoma kartasida ko‘rsatilgan muddat davomida (standart — 27 kalendar kun: kurs va imtihon davri), imtihonni qayta topshirayotganlar uchun esa qayta topshirish tugaguncha beriladi. Muddat tugagach, Ta’lim beruvchi kirishni yopishi mumkin.

5. NARX VA TO‘LOV

5.1.Kurs narxi, chegirma va yakuniy narx Shartnoma kartasida ko‘rsatiladi. Shartnoma kuchga kirgandan so‘ng yakuniy narx Ta’lim oluvchining roziligisiz oshirilmaydi.

5.2.To‘lov, agar Shartnoma kartasida boshqa muddat ko‘rsatilmagan bo‘lsa, kursning birinchi kuni yakuniga qadar qonuniy to‘lov usullari orqali to‘liq amalga oshiriladi. Elektron chek yoki bank hujjati to‘lovni tasdiqlaydi.

6. IMTIHON VA SERTIFIKAT

6.1.Ta’lim oluvchi kursning oxirgi darsidan keyin 6 kalendar kun ichida yakuniy imtihon (test, amaliy topshiriq yoki boshqa shakl) topshiradi. Uzrli sabab bo‘lsa, oldindan xabar beradi; Ta’lim beruvchi muddatni uzaytirishi mumkin.

6.2.O‘tish mezoni va qayta topshirish shartlari Shartnoma kartasida ko‘rsatiladi yoki imtihondan oldin yozma yoki elektron shaklda ma’lum qilinadi. Mezondan past natija olgan Ta’lim oluvchi imtihonni qayta topshiradi.

6.3.Sertifikat majburiy talablarni bajargan, to‘lovni to‘liq amalga oshirgan va imtihondan o‘tgan Ta’lim oluvchiga beriladi. Imtihonda aldov (boshqa shaxs nomidan topshirish, javoblarni noqonuniy olish va h.k.) aniqlansa, natija bekor qilinadi.

7. KURSDAN VOZ KECHISH VA PULNI QAYTARISH

7.1.Ta’lim oluvchi voz kechish haqida Ta’lim beruvchiga yozma yoki elektron shaklda xabar beradi; xabar qabul qilingan kun voz kechish sanasi hisoblanadi. Darslarga kelmaslik yoki imtihon topshirmaslik o‘z-o‘zidan pulni qaytarishga asos bo‘lmaydi.

7.2.Ta’lim oluvchi o‘z tashabbusi bilan voz kechganda, amalda ko‘rsatilgan xizmatlar hisobga olinib, to‘langan summa quyidagicha qaytariladi (kunlar kurs boshlangan kundan kalendar kunlarda hisoblanadi):

7.3.Summa murojaat qabul qilingan kundan 10 ish kuni ichida to‘lov qilingan usulda yoki Ta’lim oluvchi ko‘rsatgan karta yoki hisob raqamiga qaytariladi.

7.4.Shartnoma Ta’lim beruvchining aybi yoki xizmatning jiddiy nuqsoni sababli bekor qilinsa, hisob-kitob qonunchilikka muvofiq amalga oshiriladi. Kasallik, og‘ir oilaviy holat kabi asosli sabablarda Ta’lim beruvchi o‘z ixtiyoriga ko‘ra Ta’lim oluvchini keyingi guruhga bir marta ko‘chirishi mumkin.

7.5.Ushbu bo‘lim Ta’lim oluvchining qonunchilikda kafolatlangan va shartnoma bilan cheklab bo‘lmaydigan huquqlarini cheklamaydi.

8. SHAXSGA DOIR MA’LUMOTLAR

8.1.Ta’lim oluvchi o‘z F.I.Sh., telefon, identifikatsiya va to‘lov ma’lumotlari, kursdagi ishtiroki va imtihon natijalariga shartnomani bajarish (identifikatsiya, darslar va imtihonlarni tashkil etish, to‘lov hisobi, sertifikat, aloqa) maqsadida qonunchilikka muvofiq ishlov berilishiga rozilik bildiradi. Ma’lumotlar qonuniy asossiz uchinchi shaxslarga berilmaydi.

8.2.Ta’lim oluvchining foto, video tasviri va fikr-mulohazasidan marketing maqsadida faqat Shartnoma kartasidagi alohida rozilik asosida foydalaniladi. Rozilik istalgan vaqtda yozma murojaat bilan qaytarib olinishi mumkin.

9. YAKUNIY QOIDALAR

9.1.Tomonlar majburiyatlarni bajarmaganlik uchun qonunchilik va ushbu shartnomaga muvofiq javobgar bo‘ladi. Fors-major holatlarida (tabiiy ofat, urush, davlat cheklovlari, yirik texnik avariyalar) tomonlar qonunchilik doirasida javobgarlikdan ozod etiladi, majburiyatlar muddati esa mutanosib uzaytiriladi; bunday holat haqida boshqa tomon darhol xabardor qilinadi.

9.2.Nizolar avvalo muzokara yo‘li bilan, kelishuvga erishilmasa — O‘zbekiston Respublikasi qonunchiligiga muvofiq vakolatli sudda hal qilinadi.

9.3.Shartnoma qog‘ozda imzolash yoki elektron shaklda aksept qilish (“Roziman” tasdig‘i, SMS yoki boshqa elektron tasdiq, yuborilgan elektron shartnomada ko‘rsatilgan hollarda — to‘lov) orqali tuziladi, shu paytdan kuchga kiradi va majburiyatlar to‘liq bajarilgunga qadar amal qiladi. Shartnoma kartasidagi telefon va elektron manzillar tomonlarning rasmiy aloqa vositalaridir.

9.4.O‘zgartirishlar tomonlarning yozma kelishuvi bilan kiritiladi. Ayrim bandning haqiqiy emasligi qolgan bandlarga ta’sir qilmaydi. Shartnomada tartibga solinmagan masalalar O‘zbekiston Respublikasi qonunchiligiga muvofiq hal etiladi. Shartnoma bir xil kuchga ega ikki nusxada tuzildi.